我真係好L 鐘意強積金
呢個標題可以證明筆者有幾痴線，在無睇過MPFDIY,MPFier 積金大反擊嘅人眼中，強積金呢個咁地道咁本土嘅香港土炮廢物，比起豬大腸更討厭，比起臭豆腐更臭名遠播。但當你將臭豆腐點上甜醬辣醬，將豬腸配上豬紅同埋幼麵，佢哋就會發揮潛藏嘅威力，叫所有睇唔起佢哋嘅人汗顏。
香港其實最多臭小子出人頭地的故事，古有李嘉誠，遠有周星馳，近有一眾借香港股市發達的大陸冒險家，人唔做我做，殺出新血路。
強積金呢個小子，由出世開始已經俾父母(即香港人)遺棄，表現差少少就俾人鬧到狗血淋頭，表現好少少就俾人詛咒睇吓你叻得幾耐，每隔三五七年就有人話要結束佢嘅弱小生命。
經歷左20年，今年終於捱出頭，據積金局統計，全香港有12萬人嘅強積金達到100萬元。而那些由2000年12月強積金開始至2020年底一直供款的近8萬個帳戶，平均資產有49.7萬元。
取自積金局的積金觀點 (2021年6月)
如果強積金唔係俾香港人咁樣糟質，而係好好咁去呵護湊大，回報可以由歷史每年4.9%提升去10%的話，嗰啲現時擁有49.7萬元強積金資產嘅人，其實依家已經可以接近double 擁有82萬元強積金資產，再過多25年之後更會有1200萬，即45年後的強積金達到等值月薪1200萬元/167 = 7萬元，每月可以提取 7萬元x 60% = 4萬元 去作為退休後開支，詳情請睇片及睇書去了解如何令判斷退休金充足程度，與及如何令退休金長用長有。
當年香港政府推行九年強制教育，成班父母反對，覺得屋企會少左人揾食，於是政府俾個好名佢，叫「免費教育」，先至叫啲只知眼前短視利益的父母(香港人) 收聲，又要唔俾子女上學嘅父母要坐監，幾十年之後，教育對社會嘅貢獻大家有目共睹。今時今日，仲嫌免費教育唔夠多，最好包埋胎教。
強積金於香港行緊當年強制教育同一條路，又係有班只顧眼前利益的香港人反對，要政府捉啲唔供或亂攞強積金的人坐監。同樣，幾十年之後，強積金對社會嘅貢獻，大家又會有目共暏，到時大家又會嫌之前幾十年供款唔夠多，例如供款上下限點解多年都無調整，對沖長期服務金搞左咁多年都未有聲氣，eMPF 仲要等到2022年先有。
強積金儲唔儲夠錢退休，關鍵在於計劃成員有冇好好管理，有冇提升回報及降低波幅，有冇學習資產配置策略，有冇貫徹執行投資策略。
筆者知道管理強積金唔容易，退休比返工更困難，但係克服困難係人類進步嘅來源，當中能發現小小新突破，已經會令筆者樂上半天。更不用說上次年三十晚發夢嘅經歷，日有所思，夜有所夢，我應該係好鍾意強積金，但更應該真係好L鍾意香港。