恒生摩根美國股票高入息主動型ETF

強積金最俾人鬧得多就係收費高，而大家都知道強積金成份基金收費分為幾家人，當中受託行政收費與及投資管理收費佔大部份。

現時有了eMPF之後，有幾會行政收費會減少(見此)，而投資管理收費，因為成份基金投資是層層外判的關係(見此)，收費不是一時三刻可以減下來，尤其是外判給傳統mutual fund的，因為mutual fund比起ETF收費更高，令到外判給mutual fund比起外判給ETF收費更高。

今次這個由恒生發行於港交所上市的ETF，叫全港首隻主動型ETF，宣傳強調每月派息，投資美國大型股票，同時波動又低於大市。

聽落好正，實情要慢慢講解，尤其如果大家未接觸過期權 options，可能要花點時間閱讀了解。

這隻恒生摩根美國股票高入息主動型 ETF本質上與強積金股票基金一樣是feeder fund 聯接基金，是收集投資者資金再交由第三方基金打理，即係外判於JPMorgan ETFs (Ireland) ICAV – US Equity Premium Income Active UCITS ETF。

這隻JPMorgan ETFs (Ireland) ICAV – US Equity Premium Income Active UCITS ETF是愛爾蘭註冊的歐式UCITS ETF，在英國及歐洲多國都有上市，以美元計價的有於倫敦上市的JEPI.L ，其他貨幣見下：

有好多人話，於強積金買恒指ETF，點解要買收費更高嘅成份基金，而唔係直接買2800.hk，反正港股恒指指數基金都係外判2800.hk，直接買2800.hk可以少一層收費。此說法如果是強積金以外是有道理，但強積金體制有受託行政營辦等人，不單有投資管理支出，不像個人投資那麼簡單。

那麼，恒生摩根美國股票高入息主動型 ETF又點呢，話得外判JPMorgan ETFs (Ireland) ICAV – US Equity Premium Income Active UCITS ETF，其架構與強積金成份基金類似，見下:

頂層多了一個恒生，亦會多一層收費，恒指於頂層收0.35%，下面JPMorgan收0.35%, 合計收0.70%.

恒生左手交右手就收0.35%，仲高過被人鬧左25年嘅強積金。

其實大家所用的證券行如果可以買倫敦或歐洲的股票及ETF，可以直接買JPMorgan ETFs (Ireland) ICAV – US Equity Premium Income Active UCITS ETF，唔駛於港交所買恒生摩根美國股票高入息主動型 ETF (3476.hk)俾多0.35%收費。

其實大家有冇奇怪點解英歐投資者要買一隻愛爾蘭註冊但實質買美股嘅UCITS ETF咁曲折，點解唔直接買美股ETF? JP Morgan於美股有一隻 JPMorgan Equity Premium Income ETF (JEPI) (不要與倫敦上市的JEPI.L搞亂)，點解外國投資者唔直接買美股JEPI 呢？。

原因有兩個，一個係貨幣，一個係稅。JPMorgan ETFs (Ireland) ICAV – US Equity Premium Income Active UCITS ETF的英歐版本有多種貨幣及不同交易所，英歐投資者唔駛專登開個美股戶口。

稅係原因最大，而且要一步步了解。首先美國投資有兩種稅，買賣交易差額有資產增值稅(capital gain tax, CGT)，投資物派息有利息稅 (dividend tax) 或者是收益稅 (income tax) 。一般黎講，非美國投資者向美國填寫W-8BEN表格說明自己非美國居民身份的話，便不用向美國交資產增值稅 capital (自己本土稅局另計，香港唔收CGT)。

但dividend的話，因為愛爾蘭與美國有「雙重課稅協定」，向愛爾蘭投資者的派息，美國只收15%稅，是以預扣稅 withholding tax形式由證券商扣除繳交給美國。但由於香港與美國沒有「雙重課稅協定」，所以香港投資者直接買美股收息，會有30%預扣稅。

不過，今次呢隻恒生摩根美國股票高入息主動型 ETF (3476.hk)，就由香港經愛爾蘭買美國資產，所以派息部份應該只收15%。

仲有，呢隻JPMorgan ETFs (Ireland) ICAV – US Equity Premium Income Active UCITS ETF嘅持有物有兩部份，一是正股，另一是沽出(short / write ) 認購期權(call option)，此認購期權是以ETN模式進行，即是賺蝕計資產增(減) 值，而非dividend派息，於是有美國的tax benefit，唔駛交CGT.

如果香港人直接買美國上市的JEPI，JEPI買賣交易價差唔駛俾CGT，但JEPI的short call 收入會以派息形式派給投資者，於是會有30%預扣稅，而且JEPI以派息作招徠，通常派8%息，於是減少30% 預扣稅之後，香港投資者只收到8% x 0.7 = 5.6% 利息。

但愛爾蘭基金JEPI.L的期權部份是資產增值，不收CGT，另外正股部份，正常S&P500 指數只派1.5%利息，交15%預扣稅，都只係1.5%x0.15 = 0.225%，仲要正股只佔基金資產67%，令預扣稅佔0.225%0.67= 0.15% ，影響輕微。

所以恒生先至搞呢場大龍鳳，由香港買愛爾蘭基金去投資美國資產。

至於JEPI與JEPI.L的投資內容及分別，下文再談。

最後，筆者認為恒生呢類feeder fund或外判ETf或借殼ETF其實可以引入強積金，增加強積金投資範圍。

現時的強積金成份基金如果不是自己主動選股投資，便只能外判於核准匯集投資基金(即大約係由投資經理主動打理mutual fund), 與及核准緊貼指數集體計劃(即大約係被動型指數ETF)，見此。假如呢類feeder find ETF可以成為核准緊貼指數集體計劃之列，咁樣成份基金就可以投資。

其實JEPI.L 之類可以向積金局申請核准，但JPMorgan大雞唔食細米；不過恒生喺一隻小雞，要擴大市場，想靠啲唔識買英歐ETF嘅人買香港3476.hk，倒不如將3476.hk成為核准匯集投資基金 / 核准緊貼指數計劃，令一眾強積金美股成份基金可以投資，令現有打工仔多啲選擇。

不過，現時強積金法規有被動指數及不可大幅投資衍生工具的限制，要強積金法規與時並進，先可以將主動型期權ETF引入強積金。主動型ETF如果唔算係核准緊貼指數集體計劃一類，可以算是核准匯集投資基金一類。至於不可大幅投資於衍生工具的限制，其原來用意是不想太高風險，將資金蝕清光，但covered call ETF內的衍生工具用意是降低風險，沒有違背原則，只是現有衍生工具限制偏向一刀切，沒有考慮近年主動型ETF及衍生工具策略ETF的發展(見此)。

但既然3476.hk這類多元資產ETF已經可以於港交所任由市民購買，睇唔到咩理由點解強積金唔買得。

下文講下covered call ETF及JEPI, JEPI.L的分別

恒生摩根美國股票高入息主動型ETF

分享此文：

相關