槓桿投資#7-英國樓+虛幣+槓桿外匯
先見8年前一堆文章(見此)
近日youtube彈左條「低風險100萬元投資組合每年賺20%」嘅片俾筆者，咁吸引緊係click下睇下youtube 投資KOL嘅賺錢策略。
段影片條link唔放出黎，有興趣大家自己search，不過睇完本文應該唔會有興趣。
Cap圖自youtube片
youtuber 個100萬元投資組合係放係5項不同資產，令人覺得分散投資好似好低風險，嗰5項資產包括：
- 英國樓
- 加密貨幣(Bitcoin)
- 美國長債
- 現金
- 外匯
經過Youtube 演算法睇得條片嘅人，都一定持有5項資產其中一項或更多，所以會被吸引到去睇下點做到20%年回報。
上圖顯示左youtuber嘅做法，簡單黎講：
- 用40萬元本金借mortgage去買140萬元(港紙) 嘅英國樓，預期3年後樓價升15%; 期間出租回報6%，減去按揭利息之後，3年有10.08萬落袋。
- Bitcoin過往每幾年升幾倍，用20萬元本金搏佢3年升1倍， youtuber認為升100%是保守估計。
- 債券投資20萬元，因為就黎又會減息，每減1厘息長期債券價格會升20%，加埋每年3厘利息，3年連本帶利賺5.8萬。
- 現金15萬元收息1.5%一年。
- 外匯就5萬元刀仔鋸大樹，睇港元兑美元，每逢去到聯系匯率嘅兑換保證邊際就做相反，即係例如強到7.75 就用100倍槓桿做淡，弱到7.85 就相反做好，依家(2025年6月) 去到接近7.85，youtuber認為咁好時機，有金管局出手干預保證唔會輸。
一輪操作之後，youtuber預計資產升值+利息，每年賺超過20萬元，100萬元本金便有20%年均回報.
20%年均回報已經贏過畢菲特的年均15%至18%，見此，長江後浪推前浪，唔怪得畢老要退休。
年均20%回報，又話低風險，咁正。筆者就計下按月波幅：
先計英國樓，樓價按月波幅大約為1.5% (香港樓大約2.3%)， 租金收入按月波幅估計為1.4%(香港為1.6%)，按揭息率的按月波幅為0.8%，加埋計算出英國樓升值+收租的按月波幅 = 140(樓價)/40(本金) x 1.5% + 140/40 x 1.4% + 100(按揭)/40 x 0.8% = 12.15%, 見下：
筆者計算波幅
Bitcoin的按月波幅為51%，美國長債的按月波幅為3.7% (見PV)，長債息率及現金息率的按月波幅像按揭息率一樣為0.8%，而美元兑港元的按月波幅為0.244%，100倍槓桿下便是24.4%。
將上述所有按月波幅乘以本金佔整體資產比例，便得出整體投資的按月波幅為17.3%。年均回報/按月波幅 的比率為1.03，全凱利數字是0.49。全凱利數字理想是2，極端是1，低於1表示槓桿比例太高。
由於Youtube KOL好有信心佢嘅Bitcoin, 債券及槓桿外匯必賺，於是筆者試下設定債券價格波幅及匯率回報波幅為零，而Bitcoin波幅要下降至17%，全凱利數字才為2。見下：
呢個「英國樓+虛幣+槓桿外匯」出100萬揸695萬，槓桿比率Loan to equity ratio 為7倍，同依家炒濃晒嘅鋪王差唔多。
另外就係預期回報太過理想，英國樓升值後及收租後即使唔駛交稅，仲有經紀律師維修保險年檢等等一大堆開支，仲唔計140萬樓啲租客水平，遇唔到道友/租霸已經偷笑。
筆者係Bitcoin好友，但唔會傻到攞20%資產放去Bitcoin，更加唔會認為加密貨幣係低風險，見前文，筆者試驗中的加密貨幣策略，按月波幅為14%，今年回報都仲未見得人。
100倍外匯更加onL9，完全紙上談兵。聯系匯率嘅區間存在左幾十年，得幾次來回所謂的頂底，見下，息差乘以100倍都已經瓜左，按月波幅24.4% 唔知點解叫低風險。聯系匯率區間只有7.85/7.75-1=1.29%，買賣美金兌港元應該睇息差carry trade，而唔係睇區間direction。
筆者成日用槓桿，但會首先計算波幅及承受能力，回報/波幅比率及凱利數字更加以保守態度去計算，因為過度槓桿可以令投資者一鋪即死。
成個「英國樓+虛幣+槓桿外匯」portfolio嘅回報大部份靠樓價及Bitcoin上升，即使用減低左嘅波幅數字，整體按月波幅都仲有8.54%，老過20歲已經唔合適(見此).
諗住睇Youtube跟KOL就印印腳收20% 回報，勁過buy and hold BRK.A ，都係對投資抱有童真嘅人，對投資世界充滿愛同埋憧憬，佢地希望睇唔到呢篇文章，否則幼稚幻想即時破滅。
延伸閱讀