強積金基金名稱的黑色幽默
講到「強積金」（MPF），香港人嘅第一反應通常係想爆粗，或者直情當份年報係鬼片咁唔敢睇。但如果你肯放低嗰種「每個月被強行徵稅」嘅老襯心態，細心研究下積金局嗰份基金名單，你會發現起基金名稱嗰班金融才俊簡直係「現代文學大師」。本文就用一種充滿「諷刺」嘅視角，同大家一齊深度評審呢場涉及到 1.2 萬億港元嘅「集體文學創作」。
一、 「積極增長」：邊個嘅財富喺度增長？
名單入面總有幾隻叫「積極增長」（Aggressive Growth）或者「動力增長」。聽落去熱血沸騰，好似成副身家裝咗火箭引擎咁。
呢度最諷刺係：個「積極」通常係反映喺「管理費」同「行政費」上面。基金經理好「積極」咁去收你 1.5% 甚至更高嘅費，而你個倉嘅「增長」，通常係呈現一種「跳樓式」或者「地平線式」嘅動態。佢哋改個咁有「動力」嘅名，係為咗掩飾嗰種「跌就跌到最積極，升就升到最消極」嘅反差萌。
二、 「平穩」與「平衡」
如果你唔想太激，又唔想太保守，你會揀「平穩基金」（Stable Fund）或者「平衡基金」（Balanced Fund）。呢個名有一種中產階級嘅幻覺，覺得自己可以「平衡」風險。
但現實係，呢種基金通常係「平穩地跑輸大市」。佢個名嘅諷刺之處在於，佢將「平庸」包裝成「穩定」。佢嘅投資組合就好似一碗加咗太多水嘅稀粥，你想食飽（發達）又唔得，想餓死（輸光）又難。呢種「唔嗲唔吊」嘅命名，完美對應咗香港人對退休生活嗰種「求生不得，求死不能」嘅幽默感。
三、 DIS 預設投資策略：
2017 年推出嘅 DIS（俗稱懶人基金），個名改得最具哲學意味：
-
「核心累積基金」（Core Accumulation Fund）：呢個名好有層次感，好似你會累積好多財富。但其實佢累積緊嘅，係你嘅懶惰，因為佢又有一個名叫懶人基金，加起黎就係懶惰累積基金。
-
「65 歲後基金」（Age 65 Plus Fund）：呢個似老式涼茶舖，苦是苦了點，但話畀你聽一件事實，就係基金回報同心電圖橫線一樣。
四、 名字長度與碳排放
近年來，隨住 ESG 概念大行其道，基金名稱出現咗「低碳」「 ESG」「 可持續」。最諷刺嘅係，個基金名加多幾隻字，次次印呢個名已經用咗好多紙同墨水，完全係「唔環保」。
五、 「精選」
有啲基金鍾意加「精選 / 優選 / 尊尚 / 優逸」。呢個名就好似茶餐廳嘅「特選午餐」，聽落係珍饈百味，其實可能係冰箱剩低最多嘅食材。
總結
其實唔只MPF，全世界嘅基金行業內啲基金名稱其實係一種「安慰劑」。
呢班改名嘅人，係世界上最優秀嘅黑色幽默大師。佢哋用最正面、最積極、最穩健嘅詞語，去包裝一個「蝕是你的，賺是我的」嘅委託投資殘酷現實。
下次你登入 eMPF（積金易）平台，如果你發現買左基金名長度超過 10 個字，而且包含 2 個以上嘅正能量形容詞，通常就係你該檢查基金管理費（FER）及回報表現嘅時候啦。