恐慌指數(1)
筆者近日閱讀了一份SSRN文章，文章討論恐慌指數VIX的相關ETP (exchange traded product, 即係ETF, ETN之類)，SSRN文章主要討論散戶喺VIX相關ETP上面蝕錢，可能係因為佢地其實唔知VIX指數同呢啲VIX ETP冇一對一關係。
筆者想寫VIX好耐，用呢篇SSRN文章嘅一幅圖作起點，討論一下VIX嘅深層變化。
首先講，本文筆者唔係VIX專家，VIX可以好深好複雜，筆者只係分享自己嘅睇法，好像瞎子摸象，筆者只能講自己所摸到的事。
上圖是SSRN文章的截圖，顯示VIX ETP的複雜性，筆者由最低層說起：
第一層：美國上市公司
呢一層對於MPFDIY讀者來說無可能唔知，就係美國上市的公司，好像Apple , Microsoft之類。
第二層：S&P500 index
呢一層係有一間指數製作公司叫標準普爾(Standard & Poor’s)，佢地製作左一隻指數叫S&P500 index，係用美國上市最大市值的大約500間公司 (近年因為同股不同權而多於500個number)，按市值比重去計算S&P500 index，呢個S&P500指數相信大多數投資人都知。
第三層：S&P 500 index options
S&P500 index只係一個由算式計算得出的數字，S&P500 index (代號SPX) 本身冇得交易，只有於期貨 /期權交易所如CME或CBOE去買賣期貨futures及期權options。
對於散戶來說，有很多人喜歡交易SPY的options，SPY是一隻跟踪S&P500 index的ETF，而大戶更多是交易SPX的options，SPX是S&P500 index的代號，留意當中分別。
第四層：VIX index恐慌指數
終於到本文主角VIX index，呢個指數係由CBOE(芝加哥期權交易所) 製作，由要係用SPX的options去計算未來一個月(即30日之後) 的S&P index的 volatility (波幅)，VIX index是取星期五結算及於未來23日至37日到期的options，包括call及 put options的價格，再用算式去計算出volatility，即係用options市價去計算出市場認為(implied/expected) 的S&P500 index volatility。
第五層：VIX futures
CBOE製作VIX出黎，除左想啲投資者喺佢度玩SPX options，亦推出VIX futures 期貨出黎俾人玩 (見此)。同S&P500 index一樣，VIX index只係計算結果，冇得直接tarde，咁啲人就trade VIX futures。
第六層：VIX short-term futures index
由於VIX futures (期貨) 有不同時段的結算合約，有啲一個月之後到期，有啲兩個月，又有啲其他月份。如果今日喺當月第二個星期三，咁一個月後嘅VIX futures價格應該係幾多呢？因為可能冇啱啱嗰日到期嘅futures，所以冇人知。
於是指數公司如Standard &Poor’s又製作一啲指數出黎，例如S&P 500 VIX short term futures index (見此)，就係用近1個月及近兩個月的VIX futures價格，去夾出一個滾動式30日後到期的等值VIX futures index 數字。
簡單黎講係用30日前後的兩個VIX futures去 interpolate第30日的價格。好複雜？唔緊要，慢慢睇啲VIX futures index編製文件。
第七層：VIX ETP
呢層就係SSRN文章嘅戲肉，因為不同VIX ETP就係跟蹤不同VIX futures index去買賣VIX futures。 例如VXX呢隻最為VIX玩家熟悉的ETN，由Barclays發行，跟蹤 S&P 500 VIX short term futures index，等於持有平均30日後到期的VIX futures (但由於是ETN關係，可能是Barclays同ETP持有人對賭)，依家嘅VXX係第二代，喺VIX Volmageddon 事件之後，Barclays改良第一代條款再推出第二代VXXB，然後將VXXB改名回第一代的VXX。
不過，SSRN文章嘅主要結論就係講啲人以為VIX ETP等於VIX，係投資誤區。VIX ETP 只係跟蹤不同月份間距VIX futures index，唔係當刻的VIX index。可以話短期睇一兩日的升跌方向有啲相似，但長期持有是完全兩回事。
VIX ETP 除了VXX之外，有槓桿的VIXY，有反向的SVIX，有其他時段的VIXM， 仲有其他好多VIX ETP，十分五花八門。
一般人去到第七層已經暈暈地，但筆者再玩多三層。下文續。