Band 1 回報的強積金計劃
强積金成份基金收費高回報低就喺人都知，所以攞强積金恒指基金同街外指數基金比較回報係雞同鴨講。
本文嘗試用香港人好熟識嘅中學排名方法，將强積金計劃按基金回報做一個高低band 1, 2, 3排名。
先講講香港中學排名，大家都知女拔 喇沙 St Paul Co-ed喺band 1 中學，其他學校亦有被稱為band 2 及 band 3，咁點樣分band 1 ,2, 3呢？
其實唔係間學校係band 1 , 而係間學校於中一派位時接收左比較多band 1 學生，就被人視為band 1 學校。
咁學生又點分banding? 就係按小五小六的呈分試成績，加埋小學以往實力而成，教育局會將全港中一統一派位及分區校網派位嘅學生按成績分為3等份，最高分數嘅三分之一為band 1, 然後band 2,band 3 各三分之一。
Band 1 學生有優先取錄，學校仲有位就到band 2，band 3 只有執二三灘。於是喺咁嘅制度下，band 1 學生通常聚集於一間中學，於是該中學便被視為band 1 中學。
以下，便用同樣方法去將强積金計劃(學校) 按旗下成份基金的回報(學生成績) 去排banding。
首先用積金局資料 (見此)，但由於成文之時基金回報只去到2025年11月底，仲未有2025年全年回報，於是以下只排2024年banding，2025年於之後再排。
積金局資料有將成分基金分類，合計有24個基金類別，由於環球債券沒有可能同香港股票直接比較回報，於是筆者先分開不同基金類別，然後只將同一類別作回報比較。
例如下圖，在同一大中華股票基金類別，將所有强積金計劃內提供此類別的基金列出，再按2024年回報排次序，將2024年最高回報的三分之一定為band 1, 中間三分之一定為band 2, 包尾三分之一為band 3。
當定了各成分基金於其類別內的banding後，便列出同一計劃內所有成分基金的banding，見下。接著將banding取平均數，作為該計劃的banding平均數。例如以下的AMTD强積金計劃，它的16隻成分基金的banding平均數便是2.125。
有齊各計劃的banding平均數之後，便排一排各計劃：
見上表，綠色的計劃的banding平均數為2以下，即是旗下band 1 基金較多，所以亦可以算是band 1 計劃。
黃色的計劃的基金banding平均數為2至2.1，所以算是band 2 計劃。
如是者，上表橙色的計劃是band 3，banding平均數大過2.1。
觀察
綜合觀察資產值高市佔率高的大計劃如: 永明彩虹，匯豐恒生，信安800等，屬於包尾的band 3。宏利環球，中銀保誠兩個計劃屬band 2。
反而band 1 有一大堆細/微計劃，例如東亞3寶(行業，享惠，集成)，仲有海通，新地，萬全等。大計劃掹車邊屬band 1C 的有友邦及BCT積金之選。
分析
直覺會話大計劃有咁多成分基金大，資產值高，財雄勢大，應該有資源去搵好的基金經理。
但睇下永明將以往所有計劃合一，18個基金類別，結果排band 3包尾。匯豐恒生同病相憐屬band 3。
睇下第一名狀元band 1A嘅東亞行業，行業計劃呀大佬，細到冇存在感，連積金局都好似唔記得放佢入eMPF，做到2026年最後一個計劃加入eMPF，但banding平均數1.25，科科5**咁濟，領先第二名海通幾個馬位，十足十係窮書生高中狀元(見前文呂蒙正)。
BCT行業都係冇存在感，同東亞行業一樣都係有12個基金類別，但屬band 3。再睇下宏利退休精選，貴為強積金第一大幫會成員，基金類別數量一樣為12，亦只屬band 3。
所以基金及計劃回報同資產值及基金類別無關。
上表只喺2024年數字，2025年遲啲再出，到時睇下有冇升班降班。
現實上band 3 學校可以話成績唔係代表一切，仲有德體群美。但强積金，sor9y，回報就係一切。
求學不是求分數，但投資就係求回報。如果連續幾年都係band 3，但個基金經理(&計劃)仲可以若無其事繼續坐，而收費又高的話，計劃成員就趁全自由行出台後，轉去第二間讀到書嘅學校吧啦！