第600篇文章
見前文第500篇文章
原來已經過左第600篇文章，以前都會數下計下邊年邊日到達100/200/300篇文章，依家寫下寫下都冇計住計住，只係當週記咁記低自己嘅心中所想。
雖然呢個網站係叫MPFDIY，但啲MPF文章愈來愈少，其實唔係唔想寫，而係本質上MPF冇咩好寫，MPF變化好少，而且又唔想寫重覆嘢，啲MPF策略唔係每個星期可以變出黎。
對上一次成功研發到新嘅MPF策略都講緊3/4年前，而且研發完之後都要持續觀察，最好遇上大升市大跌市作為實際考驗。
MPFier近排有新變化，預計會加入3至4個新策略，有一個正個做緊，應該10月左右可以面世，有另一個都會於2025年推出，另外兩個希望下年有聲氣。
不過，呢啲effort都要有知音有回報，MPFier唔係只有筆者一個人做，其他成員都有付出，所以經團隊商量，MPFier內一些策略的展示會進行收費。
筆者個人都會付費給幫助自己慳時慳力嘅服務，例如portfolio visualiser, PV每個月慳左筆者唔少時間，所以筆者好樂意俾錢買service。
希望MPFier都可以慳到使用者時間，不過記住投資係靠自己，賺蝕都一樣。
大家睇開MPFDIY，都知到年均回報同埋 按月波幅係投資嘅起點同埋終點，學術界用年均波幅，筆者自己慣用按月波幅，比較介乎1至10%數值，易睇易明，尤其各年歲嘅適合按月波幅= (100-歲數) /10 , 即係35歲適合按月波幅6.5%, 67歲適合按月波幅3.3%。
當定立左適合自己嘅按月波幅，再睇下喺呢個波幅有咩嘢投資物或者投資策略， 所以要知道「年均回報/按月波幅」呢個比率，學術界叫Sharpe ratio，雖然條公式有些不同，但背後邏輯是一樣。
筆者多年來就是進行「尋找高回報/波幅」的故事，由buy and hold MPF基金嘅比率=1, 到用MPFier 內的策略將比率提升到2至3 。強積金再向上提升嘅空間已經有限，原因是基金投資目標沒有擴展，希望遲啲積金局對成份基金投資限制能有所放寬(見此)。
MPF 以外嘅個人投資就變化更多，ETFDIY嘅策略內不同波幅組合嘅回報/波幅比率都有5至7 (見此 www.ETFDIY.com)，已經好過大部份市面上散戶能夠接觸得到嘅水平。
要再將比率提升，以往筆者向新型資產入手，例如crypto，見此。
最近，筆者的TAA研究有大突破，以往用左近10年時間都突破唔到嘅回報/波幅=10比率天花板 (見此) ，今年不單止到達，而且仲去到18!
無錯，先發現年均回報=18%，按月波幅=1.12%，MDD=-3.5%，比率=16嘅策略，跟住再鑽深研究出現 回報=15%，波幅=0.84%，MDD = -1.87%，比率= 17.9 嘅變體。
整個策略portfolio嘅年均turnover只有6次，唔係day trade / high frequency，手續費及買賣價差近乎零。最大缺點係可能overfit，同埋投資物歷史太短，只有2022年至今表現，而且投資物比較小眾，不是人人accessable。用其他相近投資物就有自2019年年均回報9.45%，按月波幅 0.72%，MDD -1.77%，比率=13.15。
呢啲TAA投資策略研究嘅心路歷程就係咁，有幾年渾渾噩噩，消耗精神時間耐性，跟住唔知幾時，突然有突破，遠超過往境界，開拓新視野。筆者十年前將TAA放入MPF時感受過一次，今年有幸又能再次感受。賺唔賺錢只係過程中嘅副產品，真正開心喺可以向未知嘅領域去探索，好像一個人坐住飛船去外太空嘅感覺。
記得兩三年前有位意大利女太空人上左太空之後望返地球，感嘆世界之大，然後喺twitter引用左一段中國古文：
仰觀宇宙之大，俯察品類之盛，所以遊目騁懷，足以極視聽之娛，信可樂也。
呢段古文出自「天下第一行書」王羲之的《蘭亭序》(見此) 。
小結
年均回報=15%，按月波幅=0.84%，MDD = -1.87%，回報/波幅比率= 17.9 嘅equity curve 俾到筆者同一感覺: 仰觀(投資)宇宙之大，信可樂也。
